Sri Chandawimala Dhamma Treatises Preservation Board

දීර්ඝ යටත් විජිත පාලනයකින් නිදහස ලැබූ ශ්‍රී ලංකාව තුළ බෞද්ධයන් යටපත් කර කතෝලික ආගම සහ ඉංග්‍රීසි උගත් බටහිර සංස්කෘතිය වැළඳගත් සමාජයේ ඊට අනුකූලව රැකියා බෙදී යාම සමාජ වරප්‍රසාද ලැබීම වැළැක්විය නොහැකි විය. ඊට ප්‍රති විරුද්ධව සිංහල සමාජය ගොඩනැගීමත් බෞද්ධයන් ආගමික දැනුමින් පෝෂණය කිරීමත් අත්‍යවශ්‍ය කරුණක් විය.

මේ සංස්කෘතික වෙනස උදෙසා පානදුරා වාදාදී වාද අනගාරික ධර්මපාල තුමාගේ සේවය, එල්.එච්. මෙත්තානන්ද, බද්දේගම විමලවංශ හිමියන් ඇතුලු පිරිසක් ගෙන ගිය ජාතික ව්‍යාපාර බෙහෙවින් උපකාරී විය. එහි දේශපාලන නැඹුරුව උදෙසා ශ්‍රී ලංකා නිදහස් පක්ෂය බිහි විය. පරියාප්ති ශාසනයේ මෙකල සරල තේරුම් කිරීම් සඳහා රේරුකානේ චන්දවිමල මහනාහිමියන් 2500 බුද්ධ ජයන්තිය උදෙසා ආරම්භ කළ බෞද්ධ පොත් සමූහය ඉවහල් විය.යුගයේ උගතුන්ගේ ප්‍රශංසාවට පත් මේ පොත් නිහඬව කළ මහා ශාසන සේවාවක් ලෙස ප්‍රචලිත විය.

ඉතා අඩු මිලට සැපයීම හා ක්‍රමවත් බෙදා හැරීමක් නොවූ බැවින් 1987වන විට මේ පොත් පවත්වාගෙන යාමට අසීරු විය. පූජ්‍ය ගොඩිගමුවේ සෝරත, හේන්ගොඩ කල්‍යානධම්ම යන මහනාහිමියන්ගේ ශිෂ්‍ය ස්වාමින් වහන්සේලා ජනතාව අතරට මේ පොත් ගෙන ගියත් සංවිධානයක් වශයෙන් ගොඩනැගී නොතිබීම නිසා සමහර පොත් මිලට ගැනීමට පවා නැතිවිය.

රේරුකානේ නාහිමියන්ට උපස්ථානය පිණිස වැඩම කළ පූජ්‍ය කිරිඔරුවේ ධම්මානන්ද හිමියන්ගේ යෝජනාවක් හා කැපවීම මත 1987.මාර්තු 01 වන දින ශ්‍රී චන්දවිමල ධර්මපුස්තක සංරක්ෂණ මණ්ඩලය පිහිටුවන ලදී.
ආචාර්ය හොරණ වජිරඤාණ නාහිමි, ගත්කතුවර කරුණාසේන ජයලත් මහතා ආදී ප්‍ර‍දේශයේ උගතුන් කීපදෙනෙකු ද සාමාජිකයන් වශයෙන් බඳවාගෙන එතෙක් පොත් පවත්වාගෙන ගිය හේන්ගොඩ කල්‍යාණධම්ම හිමිපාණන් සභාපතිත්වයෙහි හා කුඩා අවදියේ පටන් විහාරස්ථානයේ සියලු කටයුතු වලදී සම්බන්ධ වූ වර්තමාන ලේකම් චන්ද්‍රපාල තනිප්පුලිආරච්චි මහතා ලේකම් තනතුරෙහි පිහිටුවා මේ සංවිධානය පිහිටුවිණි.

අවුරුදු විසි පහක් පමණ කාර්යක්ෂමව කටයුතු කරමින් නාහිමියන්ගේ සියලු පොත් නැවත මුද්‍රණය කිරීමෙන් සමාජගත කිරීමට මණ්ඩලය සමත් වී සිටී. නාහිමිපාණන් ගේ ධර්ම පාඨකයන් බොහෝ දෙනෙකු කරන කුදුමහත් ආධාර මෙහිදී බොහෝ උපකාරී විය.

තොරතුරු තාක්ෂණය දියුණු වී ඇති මේ යුගයේ අන්තර්ජාලය හරහා තොරතුරු සොයන්නන්ට නාහිමියන්ගේ අදහස් කියවීමට නො ලැබුණ හොත් බණ වැනි බණ කියන්නන් නිසා විය හැකි පාඩුව ආවරණය කරණු පිණිස අපද අන්තර්ජාලයට පිවිසිය යුතුයි කල්පනා කලෙමු.

ඒ අනුව 2012 ජනවාරි මස 08 වැනි පුන්පෝ දින මෙම www.rerukanemahanahimi.lk  වෙබ් අඩවිය විවෘත කෙරිණ.

---

අතිපූජ්‍ය රේරුකානේ චන්දවිමල මහානායක මාහිමිපාණන් වහන්සේ විසින් රචිත සියලු කෘතීන් පහසුවෙන් ගවේශනය කර හැකි පරිදි ප්‍රධාන කාණ්ඩ හතරක් ලෙස වර්ගීකරණය කර ඇත.

All books written by the Most Venerable Rerukane Chandawimala Maha Nayaka Thero are thoughtfully organized into four main groups to make it easier for readers to find what they’re looking for.

ශ්‍රී ලංකා ශ්වේජින් මහා නිකායේ ලේඛකාධිකාරී, ශ්‍රී චන්දවිමල ධර්මපුස්ථක සංරක්ෂණ මණ්ඩලයේ ගරු සභාපති පොකුණුවිට ශ්‍රී විනයාලංකාරාරාමය සහ සඳවිමල සෙනසුන්හි අධිපති පූජ්‍ය කිරිඔරුවේ ධම්මානන්ද ස්වාමින්ද්‍රයන් වහන්සේ

“පියෝ ච ගරුභාවනීයෝ – වත්තා ච වචනක්ඛමෝ
ගම්භීරං ච කථං කත්තා – නො චට්ඨානේනියෝජයේ “

යමෙක් ස්වකීය ශීල සම්පත්තියෙන් ශිෂ්‍යයන්ට ප්‍රිය වන්නේ ද, ගරු වන්නේ ද, සම්භාවනා කටයුතු වන්නේ ද, ශිෂ්‍යයන්ට අවවාද කරන්නේ ද, චෝදනා ආකාරයෙන් ප්‍රශ්න අසන විට ඉවසන සුලු වන්නේ ද, ගැඹුරු ධර්ම කියා දෙන්නේ ද, සිය සිසුන් සුදුසු තැන්හිම යොදන්නේ ද, ඒ උතුම් කල්‍යණමිත්‍රයා නම් වේ..

ශ්‍රී ලංකා ශ්වේජින් මහා නිකායේ ලේඛකාධිකාරී, ශ්‍රී චන්දවිමල ධර්මපුස්ථක සංරක්ෂණ මණ්ඩලයේ ගරු සභාපති පොකුණුවිට ශ්‍රී විනයාලංකාරාරාමය සහ සඳවිමල සෙනසුන්හි අධිපති පූජ්‍ය කිරිඔරුවේ ධම්මානන්ද ස්වාමින්ද්‍රයන් වහන්සේ මේ වන විට පැවිදි කර සිටින ශිෂ්‍යවරයන් දස නමට විශුද්ධි මාර්ගයේ සඳහන් පරිදිම උතුම් කල්‍යාණ මිත්‍රයෙකි

අපගේ ගුරුදේවෝත්තමයාණන් වහන්සේ මෙලව ජන්ම ලාභය ලැබුවේ කන්ද උඩරට බදුල්ලට නුදුරු කිරිඔරුව නම් රමණීය ගම් පියසේ දීය.

උන්වහන්සේ සහෝදරියන් පස් දෙනෙකුගෙන් යුත් පවුලේ බාලයා වේ. රත්නායක මුදියන්සේලාගේ අප්පුහාමි පියාටත් රත්නායක මුදියන්සේලාගේ උක්කුමැණිකා මෑණියන්ටත් සිටි එකම පිරිමි දරුවා වන රත්නායක මුදියන්සේලාගේ මුතුබණ්ඩා කුල කුමරු මෙලොව එළිය දුටුවේ 1951 අගෝස්තු මස 04 වැනිදා ය. ඔහු කුඩා කලදී ම පියා මිය ගොස් ඇත. ඉන්පසු උක්කුමැණිකා මව තම දරුවන් ද සමඟ බිබිල ප්‍රදේශයේ පදිංචියට ගොස් ඇත.

ලොකු ස්වාමින්ද්‍රයන් වහන්සේ කුඩා කල පටන්ම ඉගෙනීමෙහි දක්ෂයෙකි. ඒ බව අදටත් ප්‍රකට වන කරුණකි. උන්වහන්සේ ගිහි කාලයේ මූලික අධ්‍යාපනය ලබා ඇත්තේ වෙල්ලස්ස මධ්‍ය මහා විද්‍යාලයෙන්ය. පසුව එම විද්‍යාලයෙන් ඉවත්ව කොළඹ ඉසිපතන විද්‍යාලයෙන් ද්විතීක අධ්‍යාපනය ලබා ඇත.

වහන්සේගේ ශිෂ්‍ය‍යකු ලෙස පැවිද්ද ලබා ගෙන ඇත. පැවිදි වූ පසුත් වසර තුනක් වැනි කාලයක් පාසැල් සේවයේ යෙදුණු අප ලොකු ස්වාමින්ද්‍රයන් වහන්සේ 1980 අගෝස්තු මස 26 වන දින සේවය කළ යල්කුඹුර මහා විද්‍යාලයෙන් ඉල්ලා අස් වී ඊට පසු දින ම ලුණුගල සුනන්ද ලොකුහාමුදුරුවන්ගේ, මවගේ,ඤාතීන්ගේ සහ දායකයන්ගේ අකමැත්ත මැද රේරුකානේ චන්දවිමල මහානායක මාහිමිපාණන් වහන්සේ සොයා ඒමට පිටත් වී ඇත.

1980 අගෝස්තු මස 27 වන දින රාත්‍රී 8.20ට පමණ පොකුණුවිට ශ්‍රී විනයාලංකාරාරාම පින්බිමට පා තැබීමට සහ රේරුකානේ චන්දවිමල මහනාහිමිපාණන් වහන්සේගේ රුව දැකීමට භාග්‍යය උදාකරගෙන ඇත. මහනාහිමියන්ට කළ පළමු උපස්ථානය නම් 27වෙනි දින රාත්‍රියේ උන්වහන්සේගේ අතින් අල්ලා නැගිටීමට උදවු කිරීම ය.

ටැංගොඩ විහාරයේ සිටිය දී ශ්‍යාමෝපාලි වංශික මල්වතු විහාර පාර්ශවයේ මංගල උපොසථාගාරයේ දී මුලින් උපසම්පදාව ලබා ඇත. පසුව නැවතත් 1980 ඔක්තෝම්බර මස 05 වන දින පොකුණුවිට ශ්‍රී විනයාලංකාරාරාමයේ දී ශ්‍රී ලංකා ශ්වේජින් නිකායේ මහානායක රේරුකානේ චන්දවිමල නාහිමියන්ගේ ශිෂ්‍යයකු ලෙස උපසම්පදාව ලබා ‍ගෙන ඇත.

ඉන් පසු වසර 17ක් මුලුල්ලෙහි පරම පූජනීය රේරුකානේ චන්දවිමල මහනාහිමිපාණන් වහන්සේගේ සෙවනැල්ල මෙන් හිඳිමින් උන්වහන්සේට ඇප උපස්ථාන සිදු කළහ. ඒ කාලය තුළ දී නාහිමියන් ගෙන් තමන්ගේ දහම් ගැටලුවලට විසඳුම් ද ලබාගත් වත්මන් විහාරාධිපතීන් වහන්සේ නිරවුල්ව ධර්මය පහදා දෙන යථිවරයෙකු බවට පත්ව ඇත.

1997 ජූලි 04 වන දින රේරුකානේ මහනාහිමියන් අපවත් වූයෙන් උන්වහන්සේගේ ආදාහන පූජෝත්සවය ද කර තිබූ අවවාදයන්ට පිටු නො පාමින් සිදුකිරීමට වග බලා ගත්හ. එය මහනාහිමියන් සුජීවත්ව සිටින විට සැලකුවේ උන්වහන්සේට කරන උසස්ම ගෞරවය ලෙස ය.

ඉන් පසු ශ්‍රී විනයාලංකාරාරාමයේ විහාරාධිපති ධුරයට පත්වූයේ මහනාහිමියන්ගේ අග්‍ර උපස්ථායකව සිටි පූජ්‍ය කිරිඔරුවේ ධම්මානන්ද ස්වාමින්ද්‍රයන් වහන්සේ ය. උන්වහන්සේ මහනාහිමියන් ජීවත්ව සිටියදී සේම අපවත් වූ පසුද විහාරස්ථානයේ සියලු කටයුතු සොයා බලා කරන ලද්දේ ය. විහාරස්ථානයට සම්බන්ධ දායක පින්වතුන්ගේ සේම දහම් පොත්පත් කියවා පැමිණෙන පින්වතුන්ගේ ධර්මඥානය පිණිස ද භාවනා කර්මස්ථාන ලබාදීම පිණිස ද කටයුතු කරන ලොකුහාමුදුරුවෝ ඔවුනගේ දාන ධරම ආදී පින්කම් සඳහාද නොපිරිහෙලා ඇප කැප වන උත්ත මයෙකි.

විහාරස්ථානය මගින් පවත්වන දහම් පාසල, පොත් මණ්ඩලය ඉදිරියට කරගෙන යාමට අවශ්‍යය සියලු කටයුතු උන්වහන්සේ මනාව සංවිධානය කර ඇත. එහිදී දහම් පාසලේ ප්‍රධාන අනුශාසක ධුරයත්, ශ්‍රී චන්දවිමල ධර්මපුස්තක සංරක්ෂණ මණ්ඩලයේ සභාපතිත්වයත් විහාරාධිපති ස්වාමින්ද්‍රයන් වහන්සේ දරනු ලබයි.

විහාරස්ථානයේ අනාගත පැවැත්ම ගැන සහ නිවන් පතා පැවිදි වන පිරිසට අවකාශ සලසා දෙනු වස් 1999 වර්ෂයේ පටන් ශිෂ්‍ය පිරිසක් ඇති කරගන්නා ලදී. එම ශිෂ්‍යයන් මනා ලෙස ධර්මයෙන් විනයෙන් සහ භාෂා ශාස්ත්‍ර දැනුමින් යුත් පිරිසක් කිරීම සඳහා අදටත් මහත් වෙහෙසක් ගන්නා ගුරුදේවෝත්තමයන් වහන්සේ අනාගත භික්ෂු පිරිසගේ අභිවෘද්ධිය පතා 2600 සම්බුද්ධත්ව ජයන්තියට සමගාමීව මනරම් භූමි භාගයක සඳවිමල සෙනසුන නමින් විවේකස්ථානයක් ගොඩ නගන ලදී.

අප ආචාර්යයන් වහන්සේ මේ වන විටද බෞද්ධ ලෝකයා වෙනුවෙන් ඉටු කරන සේවය අප්‍රමාණය. එය තව දුරටත් පුළුල් කිරීම් වශයෙන් ශ්‍රී ලංකා ශ්වේජින් නිකායේ ද අභිවෘද්ධිය පිණිස 2007 වසරේ සිට එම නිකායේ ලේඛකාධිකාරී ධුරය ද උසුලනු ලබයි.

මහාචාර්ය රේරුකානේ චන්දවිමල මහනාහිමියන්ගේ අදහස් අනුව ම යමින් ස්වාර්ථ පරාර්ථ අභිවෘද්ධිය පිණිස වෙර වඩන අප ගුරුදේවෝත්තම ලොකු ස්වාමින්ද්‍රයන් වහන්සේට නිදුක් නිරෝගි චිරජීවනය ශිෂ්‍යයන් වශයෙන් අප සියලු දෙනා ප්‍රාර්ථනා කර සිටිමු.

පොකුණුවිට ශ්‍රී විනයාලංකාරාධිපති අති පූජ්‍ය කිරිඔරුවේ ධම්මානන්ද නායක මාහිමිපාණන් වහන්සේගේ චරිතාපදානය උන්වහන්සේගේ 74 වන ජන්ම දිනය නිමිත්තෙන් සකස්කරන ලදී.